Хувийн мэдээлэл

Тугчин Лувсангийн Даваасүрэн

Миний товч түүх:
Хэнтий аймгийн Батноров сумын харьяат. 1989 он хүртэл МААЭШ-ний хүрээлэнд зохион бүтээгч инженер, 1989-2004 онд МХЗЭ-ийн ТХ-ны “Залуу зохион бүтээгч” сэтгүүлийн сурвалжлагч, “Тэнгэр” мөн “Монголын залуучууд” сонины хариуцлагатай нарийн бичгийн дарга, Монголын анхны хувийн хэвлэлүүдийн нэг “Хос мөр” сонины эрхлэгчээр ажиллаж байсан.

2003 оноос эхлэн компьютерийн хэрэглээний програмын давхардсан тоогоор 7 цуврал номыг бичихийн сацуу зарим дээд сургуульд хэвлэлийн график дизайны хичээл зааж ирсэн. 2006 оноос өнөөг хүртэл шинжлэх ухаан танин мэдэхүйн “Эрдэм их хүч” сэтгүүлийн ерөнхий редакторын алба хашиж байна.

Мөн 2009 оны хичээлийн жилээс Кино урлагийн дээд сургууль (Жигжидын нэрэмжит)-д сэтгүүлч, оператор, найруулагч болон урлагийн менежерийн ангиудад “Хэвлэлийн дизайн, фото сэтгүүл зүй”, “Дижитал дүрслэлийн үндэс” хичээлүүдийг зааж байна.

Миний уран бvтээл:

2003-2004 онд “Хэвлэлийн эх бэлтгэл & Design” Бие даан vзэх цогц сурах,

2005 онд “Хэвлэлийн эх бэлтгэл & Design” нэмж засварласан II хэвлэл,

2005-2006 онд “InDesign CS/CS2-Эх бэлтгэлийн шинэ стандарт” Монголын мэргэжлийн эх бэлтгэлийн анхны цогц сурах бичиг,

 2007 онд “Хэвлэлийн график дизайн & CorelDRAW X3 ” мэргэжлийн график дизайны бие даан vзэх сурах бичиг,

2007-2009 онд “Мэргэжлийн зураг засвар & Photoshop” Монголын мэргэжлийн анхны зураг засварын цогц сурах бичиг,

2009 онд “Компьютерийг эхнээс нь зөв ашиглах гарын авлага”

 2011 онд “Мэргэжлийн зураг засвар & Photoshop CS5” зураг засварын цогц сурах бичгийн хоёрдугаар хэвлэл,

2012 онд “Компьютерийг эхнээс нь зөв ашиглах гарын авлага” номын хоёрдугаар хэвлэл,

2012 онд “Хэвлэлийн график дизайн ба Illustrator CS5, CorelDRAW Х5″ мэргэжлийн график дизайны бие даан vзэх сурах бичгийн дөрөвдүгээр хэвлэл,

2013 онд “Хэвлэлийн эх бэлтгэл-InDesign CS6” Мэргэжлийн эх бэлтгэлийн цогц сурах бичгийн хоёрдугаар хэвлэл (Б.Энхчимэгтэй хамт),

 2014 онд “Мэргэжлийн зураг засвар & Photoshop CS6” зураг засварын цогц сурах бичгийн гуравдугаар хэвлэл,

 2014 онд “Компьютерийг эхнээс нь зөв ашиглах гарын авлага” номын гуравдугаар хэвлэл (Б.Энхчимэгтэй хамт) зэрэг бүтээл туурвисан.

Миний бүтээлийг үндсэн сурах бичгээ болгон ашиглаж буй сургуулиуд:

1. ШУТИС-ын Үйлдвэрлэлийн технологи дизайны сургууль, КТМС
2. Боловсролын Их Сургуулийн Компьютер, Мэдээллийн технологийн сургууль, Дүрслэх урлаг, технологийн сургууль, Багшийн сургууль
   
3. ХААИС
4. Соёлын дээд сургууль,
5. Ulaanbaatar University (Солонгосын),
6. “Хүрээ” дээд сургууль (Солонгосын),
7. Барилгын коллеж,
8. “Шинэ иргэншил” дээд сургууль,
9. Хүнсний технологийн коллеж,
10. Техник технологийн коллеж (Солонгосын),
11. Үйлдвэрлэл урлалын дээд сургууль,
12. City Institute (Монголжингоо дээд сургууль)
13. “Харцага” кино урлагийн дээд сургууль,
14. Радио телевизийн дээд сургууль,
15. “Их монгол” дээд сургууль,
16. Кино урлагийн дээд сургууль (Жигжидын нэрэмжит).
17. “Зохиомж” дээд сургууль,
18. “Од” дизайн, технологийн дээд сургууль,
19. ШУТИС-ын Өвөрхангай дахь салбар сургууль,
20. ХБНГУ-д эх бэлтгэл, гэрэл зургийн студи байгуулан ажиллаж буй хүмүүс,
21. Нидерландын Амстердам хотноо  гэрэл зургийн студи байгуулан ажиллаж буй хүмүүс,
22. Турк улсад суралцаж буй монгол оюутнууд,
23. Хятад улсын Шанхай хотноо дизайны чиглэлээр суралцаж буй монгол оюутнууд,
    
24. БН Солонгос болон АНУ-д Барилгын интерьер дизайны чиглэлээр сурч буй 6 монгол оюутан миний “Мэргэжлийн зураг засвар & Photoshop” номыг монголд буй хүмүүсээрээ дамжуулан захиалж аваад хичээлдээ ашиглаж байна.
    

Мөн миний сурах бичгийг ашиглан монголын бүх хэвлэлийн газар, сонин, сэтгүүлийн редакциуд, дижитал зургийн газрууд өдөр тутмын үйл ажиллагаагаа явуулж байна.

**********************************************************************************

2015 оны 9-р сарын сүүлээр намрын улирал хоёрхон хоногийн дотор өвлөөр солигдов.

өчигдөр намар

өнөөдөр өвөл

Өвлийн өнгө

Цагаахан цас цонхны цаана бужигнан орж ой мод нэлдээ цасан хэвнэг нөмөрчээ.

2015 оны аз жаргалаар гэрэлтсэн өдрүүд айсуй

***********************************************************************************

Зүрхийн бүрд-миний тоонот

Олоон жилийн хойно төрсөн нутаг тоонотдоо ирэхэд өвч биеийг минь агуу их амар амгалан эзэмдэж өөдөсхөн жаахан насаа дурслаа. Зүрхийн бүрд гэдэг нэрийг хэн нэгэн анх өгөхдөө зүрх хэлбэртэй уулаар нь бус зүрхний хайртай бүрд хэмээсэн мэт бодогдох  нь нутгаа санасан хүүгийн сэтгэлийнх биз ээ.

Түм түжигнэж бум бужигнасан их хотын нүргээн дунд орж явчихаад гуч гаруй жилийн нүүр үзэхдээ он цагийн  элээсэнд улам улмаар бүдэгрэх хүрдтийн гурван бүрдээр тамгалсан эцгийн гэрийн буурийг нэгээхэн ч мартаагүй билээ. Компьютерийн дэлгэц ширтсэн ааг амьсгаагүй ажил үйлийнхээ чөлөө гарахтай зэрэг л нутгаа тэмцсэнийх харин ч сайхан зуншлагатай үеэр нь таарчээ.

Гэхдээ Мэгзэмийн Болдбаатар дүүгийн ярьж буйгаар ямар ч ган гачигтай үед Зүрхийн бүрд маань хүн малын умдаа таслаагүй бурхнаас заяасан буянтай газар орон гэнээ. Миний эцэг Данзаннямын Лувсан гэдэг хүн, Норовлингоос гаралтай Должингийн Бадамдорж хэмээх ээжтэй маань энэ л уудам хөндийд анх гал голомтоо бадрааж Цагаан өндрийн энгэрийн өвөлжөөнд миний бие ууган хүү нь болж дуугаа хадаажээ. Ер нь бол энэхүү бяцхан бүрдийг тойрсон өвөлжөө бүрийн тоогоор миний ах дүү, хамаатан садан мэндэлсэн байх юм.

Бидний багад яарсан үед нэгэндээ хэл дуулгах гэж их л сандардаг байсан бол одоо малынхаа бэлчээр дээрээс гар утсаар ярьж, олон сувгийн телевизээр дэлхийн сонин, хотын түүхий эдийн ханшийг мэдэж, хүсвэл нарны толио залгаад л G mobil-ийн зөөврийн модемоор интернэтээр ч аялах боломжтой болжээ. Өдгөө айл бүхний гадаа бага оврын ачааны машин сойгдож, нутгийнхны  хар ярианы хэлнээ “дугуй” хэмээгдэх хятад мотоцикл хамаг хар бор ажлыг нь амжуулдаг “унааны морь” болжээ.

Адуу малтай ижилсэн амар тайван хөвөх энэ нутгийн хос хун гурван хөөрхөн дэгдээхэйгээ дагуулаад нүүдлийн шувуудын жамаар халуун орныг тэмцэх лүгээ ажил амьдралын аясыг даган төрсөн хүү нь холыг зорих ч нутгаа гэх сэтгэл зүрх нь уяатай ботго шиг л эргэлддэг шүү эх орон минь !

Сэтгүүлч Тугчин Данзаннямын Лувсангийн Даваасүрэн

2011 оны 7-р сар.

Миний тоонот. Тэртээ харагдах “Цагаан-Өндөр”  хэмээх  шовх энгэрт төрсөн бууц маань байгаа. Энэ бол эцэг өвгөдөөс заяатай “Зүрхийн бүрд” хэмээх хүн малын ундтай нутаг даа.

Цагаан өндрийнхөө оройд гартал цагаан азаргатай хэдэн адуу миний чимээнээс үргээд төрсөн бууцнаас минь холгүйхэн өнгөрлөө…

Зундаа усны шувуу нь малтайгаа ижилдэх Зүрхийн бүрд маань шүү дээ…

**********************************************************************************